قصيدة بالخيم فرحة وبشاير للملا باسم الكربلائي

(هذه القصيدة ألقاها الملا باسم في حسينية القصاب ليلة 8 من محرم 1425هـــ)
بالخيم فرحة وبشاير

بالخيم فرحه وبشاير بالحرب خيل وعساكر

وانت يا جسام حاير بين الاثنين تتجـه ويـن

***

هذي لحضه البيها يتحدد شعــارك

امك انا وانتظــــر اسمـع قـــرارك

هذا ياشبل الحسـن يــوم اختيــارك

انت واعـي ولازم تحــدد مســارك

بالخيم زفـه وهــلاهــل بانتظــارك

والحرب تتنطــرك تعلــن دمــارك

زفه وشموع وهلاهل معركه وسيوف وعواسل

لو نزفك لو تقاتل هما دربين تتجه وين

***

يابني انا امك نصائـح ارد ازيـدك

بالمهـم يــا جاســم اتفكــر اريــدك

يابني هالحنه التخليها علـى أيــدك

تنمسح من بعد فتــره ومــا تفيــدك

لا كن الحنه التصير بــدم وريــدك

هذي تبقى خالده وتضمن رصيدك

لو تضل بالفرحه هايم لوتضل عالقبره نايم

وانت شتقرر يا جاسم بينك امرين تتجه وين

***

عندي كلمه ثانيه السانـي حجاهــا

وانت فاهم ما يفوتـــك محتواهـــا

هذي شمعة عرسك اليسطع ضواها

لو تهب نسمة هوى تخمد سناهــا

شمعة التضحيه المواحد طفاهـــا

خالـــده وتتنــور الدنـيــا بهداهــا

من زفافك شمعه عندك شمعة الميدان مجدك

ياضوى الاكثر يشدك تزهي نورين تتجه وين

***

الليله ونه حنـه ينجمعــن سـويــه

الليله شمعه دمعه بارض الغاضريه

يابني يامن فرقـت تصعـب عليـا

عرش زفت عرسك انصبته بديها

تريد هذا العرش والزفـه الزهيــه

لو ترجح مهـرك وســرج المنيــه

حوفتك عرشك نصبتها والمهر بيدي سرجتها

يابني وشتتختار انت دربك منين تتجه وين

***

يا نجم سعدي وتغار عليك شمسـك

يا حلم عيني وجفن عيني يحرسـك

يا غصن النبت بين حشاي غرسك

قول واحجي شتطلب وش تريد نفسك

تريد تلبس للزفاف اثيـاب عرسـك

لو تريــــد الجفـــن يصيــر لبســك

تريد ثوب العرس مني لو تريد الكفن يابني

قبالك الثوبين ذني ياضوى العين تتجه وين

***

يابني لو بيدي بوسط قلبـي اضمــك

انت غالي مو رخيص وانــا امــــك

للحرب مو هينه يا جاســـم اسلمــك

ولاهي سهله قبالي مني يطيح جسمك

لاكن الي خلاني استـوهــن بــدمـك

من شفت يابن الحسن محتار عمـك

يابني هذي مو صفاتك عالوفى تفضل حياتك

ادري ما تقبلها ذاتك وادري بعدين تتجه وين

***

ودع امه وقاصد لسوح الحــرايــب
روع بهمة علي صفوف الكتــأيــب
مثل وثبة حيدر على القــوم واثــب

ساعه لن جسمه بمسيل دماه غايب

رمله صاحت صيحه من كهف المصايب

مبارك ثياب الكفن يابـن الاطايــب

مبارك عليك الشهاده حصلتها بكل اراده

ودخلت باب السعاده وعرفت زين تتجه وين