قصيدة زينب لفت يم حسين للملا باسم الكربلائي

زينب لفت




زينب لفت يم حسين... لـﭽن ﮔابعه بالهم
تـﮔله يا ضوه عيوني... عليمن هالفزع ملتم
*******
تعنت ليه للخيمــــــــه ... وتفسر الصخر ونتهـا
طبت قعدت اﮔبالــــــه ... وعالخد تهل دمعتهـــا
تـﮔله اعليك ضلع امك ... المظلومه او مصيبتها
سولف لي يماي العين
لا تخفي علي يحسيــن
عليمن هالفزع صوبين
وأشوف ابكثر عج الخيل ... وادي كربلــــه غيم
*******
أويلي من سمعها احسين... سالت دمعة اعيونــــــه
يـﮔلها أخاف أسولف لـﭻ... او وجهـﭻ ينخطف لونه
ابـﭽتلى او ﭽتل أهل بيتي... يختي الـﮔوم يردونــــه
ولا بد ما تشوفينــه
فوﮔ الثره امـﮔطعينه
يزينب لا تنوحينــه
عينج عاليتامه النــــــــار... لو شبت بالمخيــــــــم
******
تـﮔله الكاتبك يحسيــن... من هالناس ﭽـا وينه
يـﮔل لها يماي العيـــن... كلها انـﮔلبت اعلينه
تـﮔل له حمل اضعونك ... او سدر للوطن بينه
يـﮔل لها ما يخلوني
أسدر بعد بضعوني
نيتهم يـﭽتلونـــــــي
ولابد ما تشوفينــــــي ... او شيبي يـﮔطر امن الدم

*******
والأكبر عالأرض مطروح ... يختي عيونج اتشوفه
او جاسم عالثرى مرمــــي ... ابدال العرس والحوفه
وأخوج اعلى النهر نايــــم... ويمه امـﮔطعه اﭽفوفه
او يمه رايته او جوده
او عينه ابسهم ممروده
بطل حيلي على ازنوده
لو شفتيهن ابكتـــــــــــره ... او جسمه اعلى الثره امخذم

*******
يختي او سهم المثلـــث... ابدلالي تشوفينـــــه
او عبدالله الطفل يختـي... ابدم نحره امطوقينه
او لو شفتي الشمر يمي ... ابعدي او لا تحاﭽينه
تره هو يـﮔطع ابنحـــري
او يتربع على صــــدري
يزينب عايني او صبري
لمن يحكم الباري ... او هوه ابحالنا أرحم